Morgunpóstur 30. júní 2014
Erlent Shanghai CSI 300 vísitalan hækkaði um 0,6% í nótt og Nikkei 225 um 0,4% en Hong Kong Hang Seng lækkaði um 0,2%. Hækkunin í Shanghai er rakin til bjartsýni um að framleiðslutölur sem birtar verða á morgun muni styrkja þá sýn að kínverska hagkerfið sé að styrkjast eftir hálfs árs deyfð. Evrópsk hlutabréf hafa einnig hækkað í morgunsárið. FTSE 100 um 0,2% og DAX um 0,5%. Menn bíða nú nýrra talna um sölu á íbúðarhúsnæði í Bandaríkjunum. Innlent IFS birti á föstudaginn fyrstu viðbrögð við uppgjöri Haga sem félagið birti eftir lokun markaðar. Um er að ræða 1F á rekstrarári Haga sem hefst 1. mars ár hvert. Uppgjörið var nánast alveg í takt við væntingar. Vörusala nam 18,9 mö.kr., hækkaði um 2,8% á milli ára. EBITDA var 1,4 ma.kr. og hækkaði um 5,2%. Félagið gaf til kynna aukna samkeppni á næstu misserum. Verðlag hækkaði um 0,36% í júnímánuði frá fyrri mánuði samkvæmt Hagstofu Íslands og lækkar tólf mánaða verðbólga úr 2,4% í 2,2%. Mælingin var í takti við spá IFS sem hljóðaði upp á 0,4% hækkun. Opinberar spár voru á bilinu +0,2% til +0,4%. Flutningaliðurinn hafði hvað mest áhrif á verðbólguna en hann hækkaði um 1,54% (vísitöluáhrif +0,24%). Skrásetningargjöld í háskóla hækkuðu um 10,5% (+0,07%) og liðurinn hótel og veitingastaðir hækkaði um 1,5% (+0,07%). Matarkarfan lækkaði um 0,19% á meðan húsnæðisliðurinn stóð í stað milli mánaða. Aðrir liðir lækkuðu eða hækkuðu lítillega. Samkeppniseftirlitið hefur samþykkt kaup fasteignafélagsins Eikar á fasteignafélagi Arion banka, Landfestum. Sameinað félag verður hið annað stærsta í landinu í sinni grein, með um 100 eignir sem telja um 272 þúsund fermetra. Leigutakar verða yfir 400 og efnahagur yfir 60 mö.kr.