Morgunpóstur 1. desember 2014
Erlent Birtar voru tvær PMI vísitölur fyrir nóvember í Kína í nótt. Hin opinbera mældist 50,3 í stað 50,4 í október en vísitala HSBC var 50,0, óbreytt frá fyrri mánuði. Tölurnar þykja staðfesta enn frekar hægingu kínverska hagkerfisins. PMI fyrir Japan var einnig birt og var 52,0 stig, óbreytt á milli mánaða. Olíuverð á heimsmarkaði hélt áfram að lækka í morgun. Brentolía endaði föstudaginn í 70,15 USD fatið eftir að hafa farið undir 70 fyrr um daginn. Lækkun dagsins 2,43 USD og vikunnar 10,21 USD. Rússneska rúblan og norska krónan féllu mikið í vikunni. Evrópusambandið gaf Frökkum, Ítölum og Belgum fyrir helgi þriggja mánaða frest til þess að bæta úr ríkisfjármálum sínum. Ef ríkjunum tekst ekki að bæta stöðu þeirra fyrir mars eiga þau yfir höfði sér refsiaðgerðir. Fjögur ríki til viðbótar ná ekki viðmiðum ESB; Spánn, Malta, Austurríki og Portúgal. Tólf mánaða verðbólga á evrusvæðinu mældist 0,3% í nóvember og lækkaði úr 0,4% í október. Lækkun orkuverðs mun hafa mest um þessa þróun að segja. Atvinnuleysi á svæðinu mælist nú um 11,5% og er óbreytt frá fyrra mánuði. Atvinnuleysi í stærsta hagkerfi svæðisins, Þýskalandi, er þó í sögulegu lágmarki í 6,6%. Innlent Aflaverðmæti íslenskra skipa í ágúst var 7,1% meira en í ágúst 2013. Aflaverðmæti botnfiskafla jókst um 27%. Á 12 mánaða tímabili frá september 2013 til ágúst 2014 dróst aflaverðmæti íslenskra skipa saman um 9,7% miðað við sama tímabil ári fyrr. Aukning varð í verðmæti þorskafla um 9,1% og ýsuafla 4,4%, en samdráttur varð í flatfiski, skelfiski og uppsjávarafla. Í október voru fluttar út vörur fyrir 61,2 ma.kr. og inn fyrir 50,4 ma.kr. (fob).Vöruskiptin voru því hagstæð um 10,8 ma.kr. Á sama tíma í fyrra voru þau hagstæð um 8 ma.kr. Fyrstu tíu mánuði ársins voru fluttar út vörur fyrir tæpa 488 ma.kr. en inn fyrir 494,9 ma.kr. Vöruskiptin við útlönd voru því óhagstæð um 6,9 ma.kr. en á sama tíma í fyrra voru þau hagstæð um 31,7 milljarða. Vísitala framleiðsluverðs í október hækkaði um 1,2% frá september. Vísitalan fyrir sjávarafurðir hækkaði um 2,0% og vísitala fyrir stóriðju hækkaði um 0,7%. Vísitalan fyrir matvæli hækkaði um 0,7% og vísitala fyrir annan iðnað hækkaði um 0,8%. Á 12 mánuðum hefur vísitala framleiðsluverðs hækkað um 6,5% en verðvísitala sjávarafurða hækkað um 4,1%, stóriðju um 12,1% og matvælaverð hefur hækkað um 0,9%.